LAIA (bai / ez)

Euskaraz, Langile Abertzale Iraultzaileen Alderdia. Hego Euskal Herriko alderdi politikoa, ETAren langile-frontearen barneko zatiketa batetik sortua (1974). Benetako langile-politika eramateko zailtasunak ikusten zituen talde batek ETAtik irten eta LAIA alderdi marxista-leninista sortu zuen. Euskadi komunista eta independentea zuen helburu. Horrela sortu zen LAK eta KASeko partaide izan zen hasieratik. 1976an barne-zatiketa bat izan zuen: KAS alternatibaren egokitasuna onartzen zutenek LAIA (bai) osatu zuten; besteak LAIA (ez) osatu eta KASetik irten ziren. LAIA (ez) anarkismorantz hurbildu zen eta berehala desagertu zen. LAIAk Altsasuko Mahaian parte hartu zuen eta Herri Batasunaren sortzaileetakoa izan zen (1978). 1980an KASetik eta HBtik irten egin zen, euskal instituzioetan parte hartzearen alde baitzegoen. Handik gutxira desegin zen.

Iturria: Harluxet