Fermin, San

Elizgizon nafarra (III. m.), Iruñeko lehen apezpikua tradizioaren arabera. San Ferminen bizitzari buruzko dokumentu historiko fidagarririk ezean, X. mendearen bukaeran finkaturiko kondaira da iturria: kristaututako Iruñeko senadore baten semea zen Fermin. 24 urte zituelarik apezpiku egin eta Galia ebanjelizatzera bidali zuten; Akitania, Auvernia eta Anjoun Ebanjelioa zabaldu ondoren, Amiens hirian martirizatu zuten. Kontakizun hau Nafarrerrian hedatu eta sustraitu egin zen (XII. m.); Pedro Paris apezpikuak santu honen ospakizuna ofizializatu zuen (1186). Hasieran urriaren 10ean ospatzen bazen ere, gero, uztailaren 7ra aldatu zen (1591).

Iturria: Harluxet