Zeltak ziren Europa erdialdean eta mendebaldean hedatu eta nagusitutako herri indoeuroparrak. Badirudi zelten jatorrizko kokagunea izan zela Alemaniako mendebaldea, eta K.a. II. milurtekotik aurrera talde berezi gisa agertu zirela. Lehen aztarnak K.a. 1200 urtekoak dira, Brontze-Aroaren amaierakoak hain zuzen. Burdin Aroaren lehen aldian (Hallstatt kultura, K.a. VII - VI. m.) Europan hedatzen hasi ziren, Galian, Britainiar irletan eta Iberiar penintsulan sartuz. Hedapen handiena Burdin Aroaren bigarren aldian gertatu zen (La Tène-ko kultura, K.a. V.-I. m): Italian iparraldetik sartu ziren eta Balkanak, Grezia eta Asia txikiraino iritsi ziren. Beraien arteko batasun eza izan omen zen estatu egonkorrak ez osatzearen arrazoi nagusia. Erromatarren eta herri germaniarren lehen hedapenak (K.a. II. I. m.) herri zelten gainbehera azkarra ekarri zuen.