<<< Orri Nagusira

       

puntubi.com

Mairuaren leizea

Nafarroa Garaiko Fiterotik hurbil, harkaitz aldapatsu baten gailurrean, Alhama ibaiak zeharkatzen duen ibarra menperatuz, gaztelu zahar baten kondarrak daude. Ibai ertzean leize sakon bat dago, "Mairuaren leizea" izenekoa. Jendeak uste duenez, lurpetik gazteluarekin komunikatzen omen da.

Arabiarren agintaldian, gaztelu hori soldadu mairuek okupatzen zuten eta sarritan borrokak izaten ziren hauek eta iparraldetik zetozen nafarren artean.

Borroka hauetako batean nafarren buruzagia zauritu, preso egin eta ziegan sartu zuten kateez lotuta. Hil ere egingo zen bertan alkaide mairuaren alabarengatik izan ez balitz, honek, ahal zuen guztian laguntzen baitzion. Denboraren poderioz elkarrekin maitemindu egin ziren. Baina hilabete batzuen buruan nafar presoaren familiak erreskaterako dirua bildu zuen, eta arabiarrek askatu egin zuten.

Berriro etxean, nafar gazteak ezin zuen bere maitea burutik kendu eta gazteluaren aurkako erasoa antolatu zuen, hango jabe egin eta neska mairuarekin elkartzeko asmoz.

Nafarrek gaztelua eraso zuten eta soldadu mairuak bota egin zituzten handik. Bi maiteminduak elkartu egin ziren. Egunak bazihoazen eta bi maitaleen zoriona erabatekoa zen, baina, bien bitartean, mairuek errefortzuak lortu eta gaztelua berreskuratzeko asmotan itzuli ziren. Eraso egin zuten. Nafarrak ahal bezain gogor defendatu ziren baina askoz urriagoak zirenez, oraingoan garaipena mairuentzat izan zen.

Borroka hartan, nafarren buruzagi gaztea zauritua suertatu zen eta, hura ikusi zuenean, neska mairua mutilarengana joan zen. Ahal zuen bezala ezkutuko pasagune batera garraiatu zuen eta handik, ibai ertzeko leizeraino. Behin salbu jarri zirenean, neska zauria sendatzen hasi zitzaion mutilari, baina odol ugari zerion eta zauriak garbitzeko ura behar zuen. Horrela bada, gerlariaren kaskoa hartu eta ibaira joan zen ur bila.

Bien bitartean, gazteluan, mairuak nafar gaztea eta alkaidearen alabaren bila zebiltzan, baina, jakina, ez zituzten topatu. Halako batean, zelatan zegoen mairu batek nafarraren kaskoaren distira ikusi zuen almenatik eta, ihes egitera zihoalakoan, gezi bat jaurtiki zion. Arkulariak punteria ona zuen eta erdiz erdi jo zuen neska. Mairu gazte maitemindua herioz zauritua suertatu zen. Ahal zuen bezala, leizeraino iristea lortu zuen eta hantxe erori zen hila bere maitearen gorputz gainean. Hau ere laster hil zen neskaren adats luzeak laztantzen zituen bitartean.

Bi gorputzak han geratu ziren, beren arimak bizitzan idoro ez zuten bakea aurkitzen zuten bitartean.

Geroztik, zuriz jantzitako neska mairu eder bat ikusi izan omen dute  besapean txarroa duela. Ibaira joan, txarroa urez bete eta leizera itzultzen omen da. Zaldun nafarrarekin maitemindutako mairuaren arima da. Orain dela ehunka urtez honantz ez da inor ausartu izan leize  horretan sartzen.